சட்டப்பேரவை- பா.ஜ.க. வெளிநடப்புக்கு நயினார் சொன்ன காரணம்!

சட்டப்பேரவையில் இன்று பா.ஜ.க. உறுப்பினர்கள் அவையிலிருந்து வெளிநடப்பு செய்தனர். அதற்கு நயினார் நாகேந்திரன் விளக்கம் அளித்தார்.

பேரவைக்கு வெளியே செய்தியாளர்களிடம் பேசிய பா.ஜ.க. சட்டப்பேரவைக் குழுத் தலைவர் நயினார், மாநிலத்துக்கு முழு அதிகாரம் வேண்டும்; சுயாட்சி வேண்டும் என முதலமைச்சர் இன்று 110ஆவது விதியின் கீழ் அறிக்கையை வாசித்தார்; மாநிலத்துக்கு முழு அதிகாரம் தரக்கூடாது என்பதுதான் பா.ஜ.க.வின் கருத்து; அதன் அடிப்படையில் வெளிநடப்பு செய்து, எங்கள் கருத்தைப் பதிவுசெய்திருக்கிறோம் என்றார்.

பா.ஜ.க. ஆட்சிக்கு வரும்போதெல்லாம் மாநில சுயாட்சிக்கு எதிராக நடந்துகொள்கிறது என முதலமைச்சர் குறிப்பிட்டுள்ளதைப் பற்றிக் கேட்டதற்கு, நீட் தேர்வு காங்கிரஸ் மத்திய ஆட்சியில்தான் வந்தது; 2013ஆம் ஆண்டு மே 5ஆம் தேதியே வந்துவிட்டது; இதில் எந்தவகையில் பா.ஜ.க. மாநில சுயாட்சியைப் பறிக்கமுடியும் என்று நயினார் பதில்கேள்வி எழுப்பினார்.