‘ரகு தத்தா’ படத்திற்குப் பிறகு அடுத்த ‘வுமன் செண்ட்ரிக்’ கதையான ‘ரிவால்வர் ரீட்டா’ கதையோடு வந்திருக்கிறார் நடிகை கீர்த்தி சுரேஷ். ‘மகாநடி’ படத்திற்குப் பிறகு இவர் தேர்ந்தெடுத்த வுமன் செண்ட்ரிக் கதைகள் இவருக்கு பெரிய ஹிட் கொடுக்கவில்லை. இந்த நிலையில், கீர்த்தியுடன் நடிகை ராதிகா சரத்குமாரும் இணைந்திருக்க எப்படி இருக்கிறது இந்தக் கூட்டணி ’ஹிட்டா, ஃபிளாப்பா?’ என்பதைப் பார்க்கலாம்.
ஊரையே பயமுறுத்தும் இரண்டு ரெளடி கும்பல் டிராகுலா பாண்டியன் மற்றும் நரசிம்மா ரெட்டி. இந்த இரண்டு கும்பலுக்குள் கோஷ்டி மோதல் முற்றுகிறது. அதில் டிராகுலாவை எதிர்த்த நரசிம்மா ரெட்டி கொல்லப்படுகிறார். இதனால் ஆத்திரமடைந்த அவர் தம்பி, டிராகுலா பாண்டியனைக் கொல்ல ஸ்கெட்ச் போடுகிறான். இந்த வேலை கல்யாண் மாஸ்டரிடம் வருகிறது. ஆனால், டிராகுலா பாண்டியன் தவறுதலாக கீர்த்தி வீட்டிற்கு சென்று விடுகிறார். அங்கு நடக்கும் களேபரத்தில் கீர்த்தியும் அவரது அம்மா ராதிகாவும் டிராகுலாவை தாக்க அவர் இறந்து விடுகிறார். இறந்த அவரது உடலை மறைத்து, இந்தப் பிரச்சினையில் இருந்து கீர்த்தி குடும்பம் எப்படி தப்பிக்கிறது என்பதுதான் ‘ரிவால்வர் ரீட்டா’ படத்தின் கதை.
கீர்த்தி சுரேஷ் கதையின் நாயகியாக நடிப்பில் ஜொலித்தாலும் தனது தேர்ந்த நடிப்பால் மொத்த படத்திலும் அசால்டாக ஸ்கோர் செய்கிறார் நடிகை ராதிகா. குறிப்பாக, கிளைமாக்ஸில் அவர் பேசும் ஒரு வசனத்திற்கு மொத்த திரையரங்கமும் அதிர்கிறது. நடிகர் ரெடின் கிங்ஸ்லி கதாபாத்திரம் எழுதப்பட்ட விதமும் கவனிக்க வைக்கிறது. மற்றபடி, ஒரே மாதிரியான வசன உச்சரிப்பையும் உடல் மொழியையும் எப்போது மாற்றப் போகிறீர்கள் ரெடின்? படத்தில் மற்ற நடிகர்களும் தங்களுக்குக் கொடுக்கப்பட்ட கதாபாத்திரங்களை சிறப்பாக செய்திருக்கிறார்கள். ’ரிவால்வர் ரீட்டா’ படம் வெளியாவதற்கு முன்பே அதன் போஸ்டர், டிரெய்லர் பார்த்து பலரும் ‘கோலமாவு கோகிலா’ பட சாயல் இருப்பதாக சொல்லியதை பார்க்க முடிந்தது. உண்மையில், அந்தப் படத்தைப் போலவே இதிலும் டார்க் காமெடி முயற்சி செய்திருக்கிறார்கள். ஆனால், அது கைக்கொடுத்திருக்கிறதா என்பதுதான் மிகப்பெரிய கேள்விக்குறி!
இந்தப் படத்தின் கதையை கேட்கும்போது சீரியஸ் டோனில் தோன்றும். அப்படியே கொண்டு சென்றிருந்தால் கூட ஓரளவு சமாளித்திருக்கலாமோ என்னவோ! ஆனால், டார்க் காமெடி என்ற பெயரில் பல இடங்களில் இவர்கள் முயற்சித்திருப்பது கதையோடும் ஒட்டவில்லை நமக்கும் செட்டாகவில்லை. லாஜிக் ஓட்டைகளும் எல்லை மீறி போகிறது. படத்தில் ஆறுதலான விஷயம் ஷான் ரோல்டன் இசையும், தினேஷின் ஒளிப்பதிவும்தான். கதையோட்டத்திற்கு ஏற்ற பங்களிப்பை தொழில்நுட்பக்குழுவினர் சிறப்பாக செய்திருக்கின்றனர்.
மற்றபடி, பிளாக் காமெடி என்ற பெயரில் ஏமாற்றினாலும் பரவாயில்லை கீர்த்தி சுரேஷ், ராதிகா நடிப்பிற்காக படத்தை பொருத்துக் கொள்ளலாம் என்பவர்கள் நிச்சயம் ஒருமுறை தியேட்டரில் ‘ரிவால்வர் ரீட்டா’வை பார்க்கலாம்