"எஸ்ஐஆர் படிவங்களுக்கான காலக்கெடு ஒரு வாரம் நீட்டிக்கப்பட்டது திமுகவிற்கு கிடைத்த வெற்றி" என திமுக மாநிலங்களவை உறுப்பினர் என்.ஆர்.இளங்கோ கூறியுள்ளார்.
டெல்லியில் இன்று என்.ஆர். இளங்கோ எம்.பி. செய்தியாளர்களிடம் கூறியதாவது: எஸ்.ஐ.ஆர். பணிகளை தொடங்கியது முதலே திமுக கடும் எதிர்ப்பு தெரிவித்து வருகிறது. திமுகவின் எதிர்ப்புகளில் முதன்மையானது, எஸ்.ஐ.ஆர். மேற்கொள்வதற்கான காலக்கெடு நடைமுறைக்கு ஒவ்வாததாக இருக்கிறது என முதலமைச்சர் மு.க. ஸ்டாலின் தெரிவித்திருந்தார். திமுக வழக்கும் தொடர்ந்தது; திமுக கூட்டணி கட்சிகள் அறப் போராட்டங்களை நடத்தின.
தற்போது, வாக்காளர்கள் எஸ்.ஐ.ஆர். விண்ணப்ப படிவங்களை பூர்த்தி செய்து தருவதற்கான காலக்கெடுவை டிசம்பர் 11ஆம் தேதி வரை தேர்தல் ஆணையம் நீட்டித்துள்ளதற்கு காரணமே திமுக. இது திமுகவின் ஜனநாயகப் போராட்டத்துக்கு கிடைத்த வெற்றி.
எஸ்.ஐ.ஆர். பணிகள் தொடர்ந்தும் சிக்கல்கள் நிறைந்தே உள்ளன. இந்த சிக்கல்களை தேர்தல் ஆணையம் தீர்க்கவில்லை.
எஸ்.ஐ.ஆர். விவகாரம் தொடர்பாக தேர்தல் ஆணையம் எதனையும் தெளிவாக, வெளிப்படையாக கூறுவதும் இல்லை. வாக்காளர்களின் வாக்குரிமையைப் பாதுகாக்க திமுக மட்டுமே பணியாற்றி வருகிறது.
தமிழகத்தில் 50% வாக்காளர்களுக்கு எஸ்.ஐ.ஆர். படிவங்களை நிரப்புவதில் சிரமங்கள் ஏற்பட்டுள்ளன. பீகார் தேர்தலில் வாக்களித்த வாக்காளர்கள் தமிழ்நாட்டிலும் எஸ்.ஐ.ஆர். விண்ணப்பத்தை தருகின்றனர்.
இந்த விண்ணப்பங்களைத் தரும் போது ஆவணங்கள் கொடுக்கப்பட வேண்டுமா? இல்லையா? என்பதில் குழப்பம் இருக்கிறது. இதற்கு தேர்தல் ஆணையம் விளக்கம் தரவில்லை. இவ்வாறு என்.ஆர். இளங்கோ கூறினார்.