நடிகர் கிங்காங்கின் இல்லத் திருமண நிகழ்ச்சியில் முதலமைச்சர் மு.க.ஸ்டாலின் உட்பட பல்வேறு அரசியல் தலைவர்களும் சினிமா பிரபலங்களும் கலந்து கொண்டு மணமக்களை வாழ்த்தினர்.
தமிழ் சினிமாவில் நகைச்சுவைக்குப் பெயர்போனவர் நடிகர் கிங்காங். சங்கர் என்ற இயற்பெயர் கொண்ட இவர், நடிகர் ரஜினிகாந்தின் 'அதிசயபிறவி' படம் மூலம் நகைச்சுவை நடிகராக அறிமுகமானார். தமிழ், மலையாளம், கன்னடம், தெலுங்கு உட்பட ஐந்து மொழிகளில் 300க்கும் மேற்பட்ட படங்களில் நடித்துள்ளார் கிங்காங். இவருக்குத் திருமணமாகி கலா என்ற மனைவியும், இரண்டு மகள்களும், மகன் ஒருவரும் உள்ளனர்.
நடிகர் கிங்காங்கின் மகள் திருமணம் நேற்று சென்னையில் நடைபெற்றது. அந்த திருமண நிகழ்ச்சியில் கிங்காங்கின் உறவினர்கள் மற்றும் நெருங்கிய நண்பர்கள் மட்டுமே கலந்துகொண்டனர்
திருமணத்தை தொடர்ந்து வரவேற்பு நிகழ்ச்சி நடைபெற்றது. அந்த நிகழ்ச்சியில் முதலமைச்சர் மு.க.ஸ்டாலின் கலந்து கொண்டார். அவர் காரிலிருந்து இறங்கியதும் அவருக்கு பூங்கொத்து கொடுத்து வரவேற்றார் கிங்காங். பின்னர் முதலமைச்சர் கிங்காங்கின் கையை பிடித்துக் கொண்டு மேடைக்கு சென்றார். மணமக்கள் கீர்த்தனா - நவீனுக்கு மரக்கன்று பசுமைக்கூடை வழங்கி வாழ்த்தினார்.
அதேபோல், விசிக தலைவர் தொல்.திருமாவளவன், தேமுதிக தலைவர் பிரேமலதா விஜயகாந்த், தமிழக பா.ஜ.க. மூத்த தலைவர் தமிழிசை சவுந்தரராஜன் ஆகியோரும் கலந்துக் கொண்டனர். இதில் அதிமுக முன்னாள் அமைச்சர் ஜெயக்குமார் கிங்காங்கை இடுப்பில் தூக்கி வைத்துக் கொண்டு புகைப்படம் எடுத்துக் கொண்டார். அதேபோல், திரைத்துறையை சேர்ந்த பிரபலங்களும் திருமண வரவேற்பு நிகழ்ச்சியில் பங்கேற்று மணமக்களை வாழ்த்தினர்.