சட்டப்பேரவையில் இன்று முன்வைக்கப்பட்ட தமிழக அரசின் நிதிநிலை அறிக்கையில், ஆளும் கூட்டணியில் உள்ள தமிழக வாழ்வுரிமைக் கட்சியின் தலைவர் அதிருப்தியான கருத்து ஒன்றையும் வெளியிட்டுள்ளார்.
சட்டப்பேரவை வளாகத்தில் செய்தியாளர்களிடம் அவர் கூறியது:
“ ஒன்றிய அரசு உரிய நிதி பங்கீட்டை தமிழ்நாட்டிற்கு வழங்காமல் வஞ்சித்தபோதும் லட்சக்கணக்கான கோடி கடன்களைக் கொண்டிருந்தபோதும் நிதியமைச்சர் வாசித்தளித்த நிதிநிலை அறிக்கை ஏராளமான சிறப்பம்சங்களைக் கொண்டுள்ளது.
குறிப்பாக, ஈழத் தமிழர்களுக்கு 3000-க்கும் மேற்பட்ட வீடுகளைக் கட்டித் தரும் அறிவிப்பு, பள்ளிக் கல்வித் துறையை மேம்படுத்திட சுமார் 46 ஆயிரம் கோடி ரூபாய் ஒதுக்கீடு, தமிழ்-தமிழர் மேம்பாட்டுக்கு ஏராளமான அறிவிப்புகள் இந்த நிதிநிலை அறிக்கையில் இடம் பெற்றுள்ளன.
சாதிவாரி கணக்கெடுப்பு, ஈழத்தமிழர் சகோதரர்களுக்கு இரட்டைக் குடியுரிமை ஆகிய அறிவிப்புகள் இல்லாதது ஏமாற்றமளிக்கிறது. ஒட்டுமொத்தமாக பார்க்கையில் இந்த நிதிநிலை அறிக்கை வரவேற்கும் வகையில் உள்ளது.” என்று வேல்முருகன் கூறினார்.