செய்திகள்
தமிழ்நாட்டில் கடந்த நான்கு ஆண்டுகளில் மொத்த சாகுபடிப் பரப்பு 1.51 கோடி ஏக்கராக அதிகரித்துள்ளது.
சட்டப்பேரவையில் இன்று வேளாண்மை நிதிநிலை அறிக்கை முன்வைக்கப்பட்டது. அதை வாசித்த துறை அமைச்சர் பன்னீர்செல்வம் இதைத் தெரிவித்தார்.
கடந்த 2019-20ஆம் ஆண்டில் 146 இலட்சத்து 77 ஆயிரம் ஏக்கரில் பயிர்கள் சாகுபடி செய்யப்பட்டன. இது படிப்படியாக உயர்ந்து 2023-24ஆம் நிதியாண்டில் 151 இலட்சம் ஏக்கராக அதிகரித்தது என வேளாண் நிதிநிலை அறிக்கையில் கூறப்பட்டுள்ளது.
மேலும், 2019-20 ஆம் ஆண்டில் 29 இலட்சத்து 74 ஆயிரம் ஏக்கராக இருந்த இருபோக சாகுபடிப் பரப்பு, 2023-2024 ஆம் ஆண்டில் 33 இலட்சத்து 60 ஆயிரம் ஏக்கர் என்ற அளவை எட்டியுள்ளது.
முன்னதாக, நிதிநிலை அறிக்கையை அவைக்கு முன்வைக்கும் முன்னர் மெரினா கடற்கரையில் உள்ள அண்ணா, கருணாநிதி நினைவிடங்களுக்குச் சென்ற அமைச்சர் பன்னீர்செல்வம் மலர் மரியாதை செலுத்தினார்.
