டிரம்ப் வரி விதிப்பு…ஆட்டம் கண்ட இந்திய பங்குச் சந்தை!

அமெரிக்காவின் கூடுதல் வரி விதிப்பு நாளை முதல் அமலுக்கு வரும் நிலையில், இந்திய பங்குச்சந்தை இன்று கடும் சரிவை கண்டன. இதனால் முதலீட்டாளர்கள் இன்று ஒரே நாளில் சுமார் 6 லட்சம் கோடியை இழந்ததாக கூறப்படுகிறது.

இன்றைய வர்த்தக முடிவில், சென்செக்ஸ் 910.88 புள்ளிகள் அதாவது 1.12% சரிந்து 80,725.03 ஆக நிலைபெற்றது. நிஃப்டி 274.20 புள்ளிகள் அதாவது 1.1% சரிந்து 24,693.55 ஆகக் குறைந்தது.

சந்தையில், சன் பார்மாசூட்டிகல் இண்டஸ்ட்ரீஸ், ஸ்ரீராம் ஃபைனான்ஸ், டாடா ஸ்டீல், டாக்டர். ரெட்டிஸ் லேப்ஸ் மற்றும் கோல் இந்தியா உள்ளிட்ட நிறுவனப் பங்குகள் 3% வரை சரிந்தன.

அமெரிக்க அரசு இந்தியாவிலிருந்து இறக்குமதி செய்யப்படும் பொருட்கள் மீது நாளை முதல் கூடுதலாக 25% வரி விதிக்க உத்தரவு பிறப்பித்துள்ளது. இதனால், இந்தியாவின் 86.5 பில்லியன் டாலர் ஏற்றுமதி பாதிக்கப்படலாம் என எதிர்பார்க்கப்படுகிறது. இந்த வரி விதிப்பு இன்று நள்ளிரவு முதல் அமலுக்கு வருவதால், இந்திய பங்குச்சந்தைகள் பெரும் சரிவை கண்டன.

டிரம்ப் நிர்வாகத்தின் 50% வரி விதிப்பு இந்தியச் சந்தைக்கு ஒரு பெரிய சவாலாக இருக்கும் என எதிர்பார்க்கப்படுகிறது.