இந்தியா
நீட் தேர்வில் நடந்த முறைகேடுகள், வினாத்தாள் கசிவுக்கு எதிராக டெல்லி ஜந்தர் மந்தரில் சமூக ஆர்வலர் சோனம் வாங்சுக் தலைமையில் காலவரையற்ற உண்ணாவிரதப் போராட்டம் நடைபெற்று வருகின்றது.
நீட் தேர்வு முறையில் வெளிப்படைத்தன்மையை உறுதி செய்ய வேண்டும், முறைகேடுகளுக்குப் பொறுப்பானவர்கள் மீது கடும் நடவடிக்கை எடுக்க வேண்டும், மத்திய கல்வி அமைச்சர் தர்மேந்திர பிரதான் பதவி விலக வேண்டும் ஆகிய கோரிக்கைகளை வலியுறுத்தி, சமூக ஆர்வலர்கள், பல்வேறு அமைப்புகள் கடந்த 17 நாள்களாக தொடர் உண்ணாவிரதப் போராட்டத்தில் ஈடுபட்டு வருகின்றனர்.
தொடர்ந்து உணவின்றி போராட்டத்தில் ஈடுபட்டு வருவதால், சோனம் வாங்சுக்கின் உடல்நிலை மோசமடைந்துள்ளதாக மருத்துவர்கள் தெரிவித்துள்ளனர்.
இதுவரை 8.5 கிலோ வரை உடல் எடை குறைந்துள்ளதுடன், ரத்த சர்க்கரை அளவும் ஆபத்தான அளவுக்குக் குறைந்துள்ளதாக மருத்துவர்கள் கூறியுள்ளனர்.
சோனம் வாங்சுக்கின் உடல்நிலையைக் கருத்தில் கொண்டு, பல்வேறு எதிர்க்கட்சித் தலைவர்கள், மாணவர் அமைப்புகள், சமூக ஆர்வலர்கள் உண்ணாவிரதத்தைக் கைவிடுமாறு வேண்டுகோள் விடுத்துள்ளனர். ”அவரைச் சாக விட்டுவிடாதீர்கள்” என்று 3 இடியட்ஸ் படத்தில் நடித்த ஓமி வைத்யா கேட்டுக்கொண்டுள்ளார். அப்படத்தில் அமீர்கான் ஏற்று நடித்த புங்சுக் வாங்டு பாத்திரம் சோனம் வாங்சுக்கை நினைவூட்டும் விதத்தில் உருவாக்கப்பட்டது என்பது குறிப்பிடத்தக்கது.
இருப்பினும், நீட் தேர்வு தொடர்பான கோரிக்கைகள் நிறைவேறும் வரை போராட்டம் தொடரும் என்று அவர் தெரிவித்துள்ளார்.
