132 பேர் பலி, 130 பேர் மாயம் - இலங்கையில் டித்வா புயல் துயரம்!

132 பேர் பலி, 130 பேர் மாயம் - இலங்கையில் டித்வா புயல் துயரம்!
Published on

இலங்கையில் டித்வா புயல் காரணமாக இன்று காலை வரை 132 பேர் உயிரிழந்துள்ளனர். 

மேலும் 130 பேரின் கதி என்ன என்று தெரியவில்லை என்று தேசிய பேரிடர் மேலாண்மை நிலையம் தெரிவித்துள்ளது.

பெரும்பாலும் நிலச்சரிவுகளால் அதிக உயிரிழப்புகள் ஏற்பட்டுள்ளன. 

யாழ்ப்பாணத்திலிருந்து கொழும்புக்குச் சென்ற பேருந்து ஒன்று வெள்ளத்தில் சிக்கியது. விமானப் படையினருடன் மீட்புப் படையினரும் இணைந்து 40 பயணிகளை மீட்டனர். உடல்நிலை பாதிக்கப்பட்டவர்கள் மருத்துவமனையில் சேர்க்கப்பட்டனர்.

நாட்டின் 25 மாவட்டங்களில் 1,02,877 குடும்பங்களைச் சேர்ந்த 3,73,428 பேர் டித்வா புயலால் பாதிக்கப்பட்டுள்ளனர்.

இருப்பதிலேயே அதிக உயிரிழப்புகள் கண்டி மாவட்டத்தில் ஏற்பட்டுள்ளன. 51 பேர் அங்கு இறந்துபோயுள்ளனர். அதையடுத்து, பதுளை மாவட்டத்தில் 35 பேர் இறந்துள்ளனர்.

நுவரெலியா மாவட்டத்தில் ஆறு பேர் உயிரிழந்துள்ளனர்.

ஈழத்தமிழர் தாயகப் பகுதியில் அம்பாறை மாவட்டத்தில் 5 பேரும், யாழ்ப்பாணம் மாவட்டத்தில் ஒருவரும் பலியாகியுள்ளனர்.

இலங்கையின் 19ஆவது தேசிய இராணுவப் படையைச் சேர்ந்த சார்ஜண்ட் மேஜர் ஒருவர் உட்பட படையினர் 5 பேர் அட்டன் மலைப் பகுதியில் நார்டன்பிரிட்ஜ் முகாம் நிலச்சரிவில் சிக்கிக்கொண்டது. அருகில் உள்ள இராணுவ முகாமில் இருந்தவர்களுக்கு உள்ளூர் காவல்துறையினர் தெரிவித்ததை அடுத்து, நார்டன் பிரிட்ஜ் படையினர் விரைவில் மீட்கப்பட்டனர்.

logo
Andhimazhai
www.andhimazhai.com