தமிழ் நாடு
மீண்டும் மஞ்சப்பை திட்டத்தின் மூலம் தமிழகத்தில் 188 இடங்களில் அமைக்கப்பட்ட இயந்திரங்கள் மூலம் சுமார் 3 இலட்சத்து 85 ஆயிரம் பைகள் விநியோகிக்கப்பட்டுள்ளன.
தமிழக அரசு இன்று வெளியிட்டுள்ள செய்திக்குறிப்பில் இத்தகவல் தெரிவிக்கப்பட்டுள்ளது.
” மாநிலம் முழுவதும் 14 வகையான ஒருமுறை பயன்படுத்தும் பிளாஸ்டிக் (SUP) உற்பத்தி, விற்பனை மற்றும் பயன்பாடு ஆகியவற்றைத் தடைசெய்து, ஒருமுறை பயன்படுத்தும் பிளாஸ்டிக் தடையை அமல்படுத்திய மாநிலங்களில் தமிழ்நாடு அரசும் ஒன்றாகும். தடைக்கு கூடுதலாக, மக்கள் மத்தியில் விழிப்புணர்வை ஏற்படுத்துவதற்கும், பிளாஸ்டிக்கிற்கு மாற்றானவற்றை ஊக்குவிப்பதற்கும், ஒருமுறை பயன்படுத்தும் பிளாஸ்டிக் மீதான தடையை அமல்படுத்துவதன் மூலமும் மாநிலம் பன்முக அணுகுமுறையை எடுத்து வருகிறது. “மீண்டும் மஞ்சப்பை”- “பாரம்பரிய துணிப்பைகளைப் பயன்படுத்தும் பழக்கத்தை மீண்டும் கொண்டு வருவதற்கான அழைப்பு” என்ற தலைப்பில் ஒரு மாநில பிரச்சாரம், பாரம்பரிய இயற்கை அடிப்படையிலான தீர்வுகளுடன் “தூக்கி எறியும் பிளாஸ்டிக்கிற்கு எதிரான மக்கள் பிரச்சாரம்” என்ற பெயரில், ஒருமுறை பயன்படுத்தும் பிளாஸ்டிக் மீதான தடையை அமல்படுத்துவதுடன் மக்களிடையே விழிப்புணர்வை ஏற்படுத்தவும், பிளாஸ்டிக்கிற்கு எதிரான மாற்று பொருட்களை விளம்பரப்படுத்தவும் மாண்புமிகு தமிழ்நாடு முதலமைச்சர் அவர்களால் 2021 டிசம்பர் மாதம் தொடங்கப்பட்டது. 'மீண்டும் மஞ்சப்பை பிரச்சாரம்,' பொது மக்களிடையே விழிப்புணர்வு மற்றும் சுற்றுச்சுழலுக்கு உகந்த மாற்றுப்பொருட்களை ஏற்றுக்கொள்வதில் குறிப்பிடத்தக்க தாக்கத்தை ஏற்படுத்தியுள்ளது.” எனத் தெரிவித்துள்ள மாநில அரசு, இது தொடர்பாக எடுக்கப்பட்ட நடவடிக்கைகளை விரிவாகப் பட்டியலிட்டுள்ளது.
”விழிப்புணர்வு, செயலாக்கத்தில், அதன் முயற்சிகளுக்கு கூடுதலாக, தமிழ்நாடு மாசுக்கட்டுப்பாட்டு வாரியம் மஞ்சப்பை விருதுகள் போன்ற முன்முயற்சிகள் மூலம் நிலையான நடைமுறைகளை மேற்கொண்டு வருகிறது. 2023 ஆம் ஆண்டு தொடங்கப்பட்ட இந்த விருதுத் திட்டம், பிளாஸ்டிக்கிற்கு மாற்றானவற்றை ஊக்குவிப்பதிலும் சமூக விழிப்புணர்வில் தீவிரமாக ஈடுபடுவதிலும் சிறந்து விளங்கும் கல்வி நிறுவனங்கள் மற்றும் வணிக நிறுவனங்களை அங்கீகரிக்கிறது. அதன் தொடக்கத்தில் இருந்து, மஞ்சப்பை விருதுகள் ஆறு பள்ளிகள், ஆறு கல்லூரிகள் மற்றும் மூன்று வணிக நிறுவனங்களுக்கு வழங்கப்பட்டுள்ளன. இது சமூக ஈடுபாடு மற்றும் நிலைத்தன்மை முயற்சிகளுக்கான அர்ப்பணிப்பை கணிசமாக மேம்படுத்துகிறது.
மீன்டும் மஞ்சப்பை பிரச்சாரத்தை வலுப்படுத்தவும், சுற்றுச்சூழலுக்கு உகந்த மாற்றுகளை அணுகுவதை மேம்படுத்தவும், துணிப் பைகளை வழங்கும் புதுமையான மஞ்சள் பை விற்பனை இயந்திரங்களை தமிழ்நாடு அரசு அறிமுகப்படுத்தியது. மாநிலம் முழுவதும் அதிக அளவில் மக்கள் நடமாடும் 188 இடங்களில் நிறுவப்பட்ட இந்த இயந்திரங்கள் கிட்டத்தட்ட 385,000 பைகளை இதுவரை விநியோகித்துள்ளன.
இந்தப் பிளாஸ்டிக் தடையானது, 238 ஒருமுறை பயன்படுத்தும் தடை செய்யப்பட்ட பிளாஸ்டிக் உற்பத்தித் தொழில்களை மூடுவதற்கு வழிவகுத்துள்ள அதே வேளையில், 725 சுற்றுச்சூழலுக்கு உகந்த மாற்றுப் பொருட்கள் உற்பத்தியாளர்களின் உயர்வுக்கு வழிவகுத்தது. ஒருமுறை பயன்படுத்தும் பிளாஸ்டிக்குகள் மீதான தடையை அமல்படுத்துவதன் ஒரு பகுதியாக, மாநிலம் முழுவதும் 16 லட்சத்துக்கும் அதிகமான ஆய்வுகள் உள்ளாட்சி அமைப்புகளால் மேற்கொள்ளப்பட்டு, சுமார் 2600 டன் தடைசெய்யப்பட்ட ஒருமுறை பயன்படுத்தும் பிளாஸ்டிக்குகள் பறிமுதல் செய்யப்பட்டுள்ளன. மேலும், விதியை மீறுபவர்களிடம் இருந்து 19 கோடி ரூபாய் அபராதம் விதிக்கப்பட்டுள்ளது.
தமிழ்நாடு மாசு கட்டுப்பாடு வாரியம், செப்டம்பர் 26-27, 2022 அன்று, 173 கண்காட்சியாளர்கள் மற்றும் 5,000 பார்வையாளர்களைக் கொண்ட சுற்றுச்சூழல் மாற்றுகள் மற்றும் புதிதாக தொழில் தொடங்குவோர் மாநாட்டின் தேசிய கண்காட்சியை நடத்தியது. இந்த நிகழ்வு உற்பத்தியாளர்கள், விற்பனையாளர்கள் மற்றும் நுகர்வோர் இடையே இணைப்புகளை எளிதாக்கியதுடன் சூழல் நட்பு தீர்வுகளை முன்னிலைப்படுத்தியது. கண்காட்சியைத் தொடர்ந்து, தமிழ்நாடு மாசு கட்டுப்பாடு வாரியம், ஒருமுறை மட்டுமே பயன்படுத்தும் பிளாஸ்டிக்கிலிருந்து மாறுவதற்கு உதவும் வகையில், 725 சுற்றுச்சூழல் மாற்று உற்பத்தியாளர்கள் மற்றும் விற்பனையாளர்களின் கோப்பகத்தை வெளியிட்டது.” என்றும் தமிழக அரசு தெரிவித்துள்ளது.
