செய்திகள்
60 வயதைத் தாண்டி வாழ்கிறவர்கள் அதிர்ஷ்டசாலிகள் என்று ஆகிவிட்ட இன்றைய சூழலில் தனது 94 வது வயதில் ஒரு படத்தை இயக்கி, அதை அடுத்த வாரம் திரைக்குக் கொண்டுவருகிறார் இயக்குநர் சிங்கீதம் சீனிவாச ராவ்.
1931ல் பிறந்து ‘57ல் ‘மாயாபஜார்’ படத்தின் மூலம் இயக்குநராக அறிமுகம் ஆனவர் சிங்கீதம் சீனிவாச ராவ். தமிழ், தெலுங்கு, கன்னடம்,, இந்தி, ஆங்கிலம் ஆகிய பல மொழிகளில் படங்கள் இயக்கிய சிங்கீதம் கமலுக்கு மிக நெருக்கமானவர். அவரது ‘ராஜ பார்வை’ தொடங்கி, புஷ்பக விமானம், அபூர்வ சகோதரர்கள், மைக்கேல் மதன காமராஜன் என்று பல அபூர்வ படங்களை இயக்கியவர்.
இவர் நீண்ட இடைவெளிக்குப் பிறகு ‘சிங் கீதம்’ திரைப்படத்தை இயக்கி முடித்திருக்கிறார். வைஜயந்தி மூவிஸ் மற்றும் ஸ்வப்னா சினிமா சார்பில் நாக் அஸ்வின் இப்படத்தைத் தயாரித்துள்ளார். இப்படத்தில் அயன், அஹல்யா பம்ரு மற்றும் ஷாலினி கொண்டேபுடி ஆகியோர் முக்கிய கதாபாத்திரங்களில் நடித்துள்ளனர். ராக் ஸ்டார் தேவி ஸ்ரீ பிரசாத் இப்படத்திற்கு இசையமைத்துள்ளார்.
ஏற்கனவே வெளியான ‘சிங் கீதம்’ படத்தின் டீசரும் பாடல்களும் நல்ல வரவேற்பைப் பெற்றுள்ள நிலையில், ஜூன் 11-ஆம் தேதி உலகெங்கும் திரையரங்குகளில் இப்படம் ரிலீஸாகிறது. இந்த நிகழ்வில் கமல்ஹாசன் தலைமை விருந்தினராகக் கலந்துகொண்டு, சீங்கீதத்துடனான தனது தொடர்பைப் பகிர்ந்துகொண்டார்.
’’மாயாபஜார்' திரைப்படத்திலிருந்து தற்போதைய 'சிங் கீதம்' வரை, சிங்கிதம் சீனிவாச ராவிடம் எந்த மாற்றமும் இல்லை. சினிமா எப்போதுமே அவருடன் இருந்துள்ளது. இது மிகவும் அரிதான விஷயம். ஏனென்றால்... எனக்கு 20 வயதாக இருந்தபோதே நான் அவருடன் பணியாற்றத் தொடங்கினேன். அவருடைய படங்களில் தயாரிப்பாளராகவும், உதவி இயக்குநராகவும் பணியாற்றியுள்ளேன். அவருடன் பணியாற்ற வேண்டும் என்பதே என் நோக்கம். பல ஆண்டுகளுக்கு முன்பு, அவர் என்னிடம் இரண்டு கதைகளைச் சொன்னார்.
அவற்றில் ஒன்று ‘புஷ்பக விமானம்’. இரண்டாவது இந்த ‘சிங் கீதம்’. இதில், ‘புஷ்பக விமானம்’ திரைப்படமாக எடுக்கப்பட்டுள்ளது. இப்போது இரண்டாவது கதையான ‘சிங் கீதம்’ ரசிகர்களின் பார்வைக்கு வரத் தயாராக உள்ளது. எனக்கு 20 வயதாக இருந்தபோது இந்த ‘சிங் கீதம்’ கதையைக் கேட்டேன். இப்போது எனக்கு 70 வயதாகிறது. இப்போது நான் அந்தத் திரைப்படத்தைப் பார்க்கப் போகிறேன்.
சில எண்ணங்களும் கதைகளும் காலத்தால் அழியாதவை என்பதற்கு சிங்கிதத்தின் கதைகள் ஒரு சிறந்த எடுத்துக்காட்டு. அவை காலத்தால் அழியாதவை என்பதை ‘சிங் கீதம்’ நிரூபித்துள்ளது. பலர் சிங்கிதத்தின் பெயரை ‘சங்கீதம்’ என்று உச்சரிக்கிறார்கள். ஆனால் இந்தப் படத்தின் தலைப்பால் அந்தக் குழப்பம் நீங்கிவிட்டது. இனிமேல் அனைவரும் அவரை ‘சிங்கீதம்’ என்றே அழைப்பார்கள். இசை அவர் பெயரிலேயே உள்ளது. அவர் ஜென் ஜி-க்கு முன்பே இருந்தவர். இன்று அவரைக் கொண்டாடுவது பெரும் மகிழ்ச்சி. நான் இப்போதும் அவரது உதவி இயக்குநராகப் பணியாற்ற விரும்புகிறேன்.
எந்தப் படம் வெற்றி பெறும், தோல்வியடையும் என்று யாராலும் கணிக்க முடியாது. ஆனால், படம் முடிந்ததும் எல்லோரும் மகிழ்ச்சியாக இருக்கிறார்களா? இல்லையா? அது தெரிந்துவிடும். ‘புஷ்பக விமானம்’, ‘மும்பை எக்ஸ்பிரஸ்’, ‘அபூர்வ சொதருலு’ போன்ற படங்கள் ஒரு நல்ல மனப்பான்மையுடன் உருவாக்கப்பட்டன. ‘சிங் கீதம்’ படமும் அதே மனப்பான்மையுடன் வருகிறது. இந்தப் படத்தை நானே தயாரித்தது போல் உணர்கிறேன். நான் ஒரு இணைத் தயாரிப்பாளர் போல் உணர்கிறேன். நாகிக்கும் அது தெரியும். ‘சிங் கீதம்’ மீது எனக்கு எப்போதுமே மரியாதை உண்டு.
இந்தப் படத்தை ராஜ்கமல் பிலிம்ஸ் தயாரித்திருந்தால் இன்னும் சிறப்பாக இருந்திருக்கும் என்று நான் உணரும் படங்களில் இதுவும் ஒன்று. இந்த நிகழ்ச்சிக்கு வந்திருப்பதில் நான் மிகவும் மகிழ்ச்சியடைகிறேன். மூன்று மாதங்களுக்கு முன்பு நீங்கள் என்னிடம் சொல்லியிருந்தால், நானும் படக்குழுவில் ஒரு பகுதியாக இருந்திருப்பேன். அந்த வாய்ப்பை நான் தவறவிட்டுவிட்டேன். ஆனால், சிங்கிதம் மீது எனக்கு முழு நம்பிக்கை உள்ளது. அவருடன் பணிபுரிய எனக்கு மற்றொரு வாய்ப்பு கிடைக்கும் என்று நான் உறுதியாக நம்புகிறேன்," என்று அவர் கூறினார்.
