செய்திகள்
தமிழக வெற்றிக் கழகத்தின் இன்றைய மாவட்டச் செயலாளர்கள் கூட்டம் திடீரென ஒத்திவைக்கப்பட்டுள்ளது. இன்றைய கூட்டத்தில் தவெக உறுப்பினர் சேர்க்கைக்கு புதிய செயலியை அறிமுகப்படுத்தவும் திட்டமிடப்பட்டிருந்தது.
அடுத்த ஆண்டு நடைபெறவுள்ள சட்டப்பேரவைத் தேர்தலை எதிர்கொள்ள த.வெ.க. வியூகம் அமைத்து வருகிறது. அதன் ஒரு பகுதியாக, ஆகஸ்டு 25ஆம் தேதி மதுரையில் கட்சியின் 2ஆவது மாநாடு நடைபெற உள்ளது. இந்த மாநாட்டில் மக்கள் சந்திப்பு சுற்றுப்பயணம், கட்சியின் எதிர்கால திட்டங்கள் குறித்து விஜய் பேச இருக்கிறார். இதற்கிடையே, மாநாடு மற்றும் உறுப்பினர் சேர்க்கை குறித்து மாவட்ட செயலாளர்களுடன் விஜய் கலந்துரையாட இருக்கிறார். இந்த கலந்துரையாடல் கூட்டம் இன்று பனையூரில் உள்ள கட்சி அலுவலகத்தில் நடைபெற இருந்தது.
இதற்கான அழைப்பு மாவட்ட செயலாளர்களுக்கு விடுக்கப்பட்டது. இந்த கூட்டத்தில், உறுப்பினர் சேர்க்கைக்கான புதிய செயலியை விஜய் அறிமுகம் செய்வார் என தெரிவிக்கப்பட்டது.
இந்த நிலையில் புதிய செயலியை அறிமுகம் மற்றும் மாவட்ட செயலாளர்கள் கூட்டம் திடீரென ஒத்தி வைக்கப்பட்டுள்ளது. செயலியில் ஏற்பட்டுள்ள தொழில்நுட்ப கோளாறு காரணமாகவே அதன் அறிமுக விழா தள்ளி வைக்கப்பட்டுள்ளது. மாவட்டச் செயலாளர்களுடனான ஆலோசனை கூட்டம் வருகிற 24ஆம் தேதி நடைபெற இருப்பதாக தகவல்கள் வெளியாகி உள்ளன.
அன்றைய தினம் புதிய செயலியை தொடங்கி வைத்து மாவட்ட செயலாளர்களுடன் விஜய் ஆலோசனை நடத்த உள்ளார்.
