செய்திகள்
நாம் தமிழர் கட்சியின் தலைவர் சீமான் கோவையில் இன்று செய்தியாளர் சந்திப்பின்போது பெண் செய்தியாளரிடம் அநாகரிகமாகப் பேசியதற்கு பத்திரிகையாளர் மன்றங்கள் கண்டனம் தெரிவித்துள்ளன.
கோவையில் இன்று மதியம் செய்தியாளர்களைச் சந்தித்த சீமான், பெண் செய்தியாளர் ஒருவரிடம் பிரபாகரனின் அண்ணன் மகன் உங்களைப் பற்றி இப்படிக் கூறியிருக்கிறாரே எனக் கேட்டதற்கு, அவன் ............... என அச்சிலேற்றமுடியாத அநாகரிக வார்த்தையைச் சொல்லிவிட்டு கோபமாக நகர்ந்துவிட்டார். அதை அதே தொலைக்காட்சியும் நேரலையில் ஒளிபரப்பியது.
இதில் சீமானுக்கு கோவை பத்திரிகையாளர் மன்றம் கண்டனம் தெரிவித்துள்ளது. பொது வாழ்க்கைக்கு வந்து ஆண்டுகள் கழிந்தும் பொதுவெளியில் பெண்களிடம் நாகரிகமாகப் பேசத் தெரியாத ச்ச்சீமானே என்று குறிப்பிட்டு, வன்மையான கண்டனம் என்று கூறப்பட்டுள்ளது.
இதேவேளை, சென்னைப் பத்திரிகையாளர் மன்றம் வெளியிட்டுள்ள அறிக்கையில், “பத்திரிகையாளர்களை இழிவுபடுத்தும் கண்ணியக் குறைவான வார்த்தைகளை தொடர்ந்து பயன்படுத்திவரும் நாம் தமிழர் கட்சியின் ஒருங்கிணைப்பாளர் சீமானுக்கு பத்திரிகையாளர் மன்றம் கடும் கண்டனத்தை தெரிவித்துக்கொள்கிறது.” என்றும்,
”ஊடகங்களில் உரையாடும் எளிய மனிதர்களே நாகரிகமான சொற்களைப் பயன்படுத்தும்போது, ஒரு கட்சித்தலைவரான சீமான் பொது இடங்களிலும் ஊடக சந்திப்புகளிலும், தொடர்ந்து ஆபாச, இழி சொற்களைப் பயன்படுத்திவருவது அதிர்ச்சியளிப்பதாக இருக்கிறது.” என்றும் குறிப்பிடப்பட்டுள்ளது.
”கோவையில் நடைபெற்ற சந்திப்பில், சீமான் மீது பிரபாகரனின் அண்ணன் மகன் எழுப்பியிருக்கும் குற்றச்சாட்டுகளை கேள்வியாக முன்வைத்த புதிய தலைமுறை பெண் செய்தியாளரிடம் முகம்சுளிக்கும் வகையில் பதிலளித்திருக்கிறார் சீமான்.
செய்தியாளரைத் தனிப்பட்ட முறையில் குறிப்பிட்டு சொல்லவில்லை என்றாலும், பெண் செய்தியாளருக்கு பதிலளிக்கிறோம் என்ற கவனமும் பொறுப்பும் இல்லாமல் (அச்சிலேற்ற முடியாத வார்த்தைகளைக் கொண்டு) சீமான் பேசியிருப்பது மிகவும் கண்டிக்கத்தக்கது.
சீமான், பொது இடங்களிலும் ஊடக சந்திப்புக்களிலும் முதிர்ச்சியான சொற்களைப் பயன்படுத்துவதும். கண்ணியம் அறிந்து நடந்துகொள்ள வேண்டும் என்றும் சென்னை பத்திரிகையாளர் மன்றம் வலியுறுத்துகிறது.” என்றும் அவ்வறிக்கையில் கூறப்பட்டுள்ளது.
