விளையாட்டு
சர்வதேச டெஸ்ட் கிரிக்கெட் போட்டிகளில் குறைந்த பந்தில் 200 விக்கெட்டுகளை வீழ்த்திய 4ஆவது வேகப்பந்துவீச்சாளர் என்ற சாதனையை படைத்துள்ளார் இந்திய வீரர் பும்ரா.
ஆஸ்திரேலியாவுக்கு எதிரான 4ஆவது டெஸ்டில் இந்த சாதனையை பும்ரா படைத்துள்ளார்.
இந்தியா - ஆஸ்திரேலியா இடையிலான 4ஆவது டெஸ்ட் போட்டி மெல்போர்னில் நடைபெற்று வருகிறது. இதில் முதல் இன்னிங்சில் ஆஸ்திரேலியா 474 ரன்களும், இந்தியா 369 ரன்களும் அடித்தன.
இதனையடுத்து 105 ரன்கள் முன்னிலையுடன் 2ஆவது இன்னிங்சை தொடங்கிய ஆஸ்திரேலியா 6 விக்கெட்டுகளை இழந்து 94 ரன்களுடன் தடுமாறி வருகிறது. மார்னஸ் லபுசாக்னே 43 ரன்களுடன் களத்தில் உள்ளனர். இந்தியா தரப்பில் பும்ரா 4 விக்கெட்டுகளும், சிராஜ் 2 விக்கெட்டுகளும் வீழ்த்தியுள்ளனர்.
இந்த ஆட்டத்தில் பும்ரா கைப்பற்றிய 4 விக்கெட்டுகளையும் சேர்த்து டெஸ்ட் கிரிக்கெட்டில் அவர் இதுவரை 200 விக்கெட்டுகள் வீழ்த்தியுள்ளார்.
44 டெஸ்ட் போட்டிகளில் 202 விக்கெட்டுகளை வீழ்த்தி இந்த சாதனையை படைத்துள்ளார் பும்ரா. முன்னாள் வேகப்பந்து வீச்சாளர் கபில்தேவ் 50 டெஸ்ட் போட்டிகளில் 200 விக்கெட்களை எட்டியிந்த நிலையில் பும்ரா அவரது சாதனையை முறியடித்துள்ளார்.
அதிவேகமாக 200 விக்கெட்கள் வீழ்த்திய இந்திய பவுலர்கள் பட்டியலில் ரவிச்சந்திரன் அஸ்வின் (37 டெஸ்ட்), ரவீந்திர ஜடேஜா (44 டெஸ்ட்), ஹர்பஜன் சிங் (46 டெஸ்ட்), அனில் கும்பிளே (47 டெஸ்ட்) என சுழற்பந்துவீச்சாளர்களே முதல் 5 இடத்தில் இருக்கும் நிலையில், பும்ரா முதல் இந்திய வேகப்பந்துவீச்சாளராக இந்த சாதனையை எட்டியுள்ளார்.
அதேபோல், குறைந்த பந்தில் 200 விக்கெட்டுகளை வீழ்த்திய வேகப்பந்து வீச்சாளர்கள் பட்டியிலில் வாக்கர் யூனிஸ் (7725 -பந்துகள்) முதல் இடத்திலும், டேல் ஸ்டெயின் (7848 - பந்துகள்) இரண்டாவது இடத்திலும், ரபடா (8153 -பந்துகள்) மூன்றாவது இடத்திலும், பும்ரா (8484 - பந்துகள்) தற்போது நான்காவது இடத்தை பிடித்திருப்பது குறிப்பிடத்தக்கது.
